Letras: Massimo Ranieri. Grazie Massimo!. Lacreme Napulitane.

Mia cara madre,
sta pe' trasi Natale,
e a sta luntano cchiu mme sape amaro....
Comme vurria allumma duje o tre biangale...
comme vurria senti nu zampugnaro!...

A 'e ninne mieje facitele 'o presebbio
e a tavula mettite 'o piatto mio...
facite, quann'e 'a sera d''a Vigilia,
comme si 'mmiez'a vuje stesse pur'io...

E nce ne costa lacreme st'America
a nuje Napulitane!...
Pe' nuje ca ce chiagnimmo 'o cielo 'e Napule,
comm'e amaro stu ppane!

Mia cara madre,
che so', che so' 'e denare?
Pe' chi se chiagne 'a Patria, nun so' niente!
Mo tengo quacche dollaro, e mme pare
ca nun so' stato maje tanto pezzente!

Mme sonno tutt''e nnotte 'a casa mia
e d''e ccriature meje ne sento 'a voce...
ma a vuje ve sonno comm'a na "Maria"...
cu 'e spade 'mpietto, 'nnanz'o figlio 'ncroce!

E nce ne costa lacreme st'America
a nuje Napulitane!...
Pe' nuje ca ce chiagnimmo 'o cielo 'e Napule,
comm'e amaro stu ppane!

Mm'avite scritto
ch'Assuntulella chiamma
chi ll'ha lassata e sta luntana ancora...
Che v'aggi''a di? Si 'e figlie vonno 'a mamma,
facitela turna chella "signora".

Io no, nun torno...mme ne resto fore
e resto a fatica pe' tuttuquante.
I', ch'aggio perzo patria, casa e onore,
i' so' carne 'e maciello: So' emigrante!

E nce ne costa lacreme st'America
a nuje Napulitane!...
Pe' nuje ca ce chiagnimmo 'o cielo 'e Napule,
comm'e amaro stu ppane!